اعرفكم بنفسي

السلام عليكم اولا

بسم الله الرحمن الرحيم

انا اخوكم مصطفى من مصر تحديدا المنوفية وشبين الكوم لو حد سمع عنها مع انها مش ع الخريطة اصلا

انا عندي 21 سنة

خريج جامعة كلية تجارة انجليزي
وحاليا بشتغل في محل تحف وانتيكات مؤقتا على ما اخلص الجيش وكده

انا بعشق الكمبيوتر والانترنت ومتخصص صيانة كومبيوتر
وبحب القراءة جدا جدا وبعشق حاجة اسمها بلياردو

انا حبيت ايكاريام لانها بتحسس الواحد اد ايه هو حكيم في قراراته واد ايه هو ممكن يتعلم الصبر وانه يفكر في حاجات كتير

وعندي امبراطورية صغيرة كده عبارة عن 4 مدن

اساميهم

Isengard
Imladris
Lothlorien
Fangorn
وانا سميتهم الاسامي دي عشان بعشق فيلم مملكة الخواتم والاسامي دي اسماء ممالك فيه
وكل واحده مختصة بمهمتها
يعني اول واحدة دي جزيرة الكبريت وكانت في الفيلم مملكة الجان والفيلم كله منها وانا سميتها كده لان دي مدينتي الاصلية

التانية دي كانت مدينة كبيرة اوي في الفيلم كلها رخام وانا عملت اسمها على مدينة الرخام عندي

وتالت واحده كانت المملكة بتاعت البلور في الفيلم اللي ساعدت البطل على انه ينجو من كذا حاجة وانا سميتها باسم مدينة البلور عندي لان البلور ده بيعمل حاجات كتير اوي مهمة

واخر مدينة اللي هى مدينة العنب كانت في الفيلم مدينة الشجر اللي بيتحرك وانا حبيت اسميها كده عشان العنب وانه زرع ونباتات وكده

انا عارف اني طولت عليكو بس انا معتبركوا اخواتي وبفضفض معاكو

ده غير ان ده طلب الاخت كوتا

ولا اقول نهلة ؟

ان كل واحد لازم يعرف نفسه ويقول اسماء مدنه ويكتب هو سماهم كده ليه

وياريت كلنا نتواصل هنا مع بعض ومش نبقى مجردد عدد في اللمون زي ما بنقول عندنا في مصر

ودمتم بخير